Home KITAIFA SERIKALI KUONGEZEA UWEZO KITUO CHA KUPOZA UMEME MBAGALA

SERIKALI KUONGEZEA UWEZO KITUO CHA KUPOZA UMEME MBAGALA

Google search engine

*LENGO NI KUONDOA CHANGAMOTO YA KUKATIKA UMEME MBAGALA, NAIBU WAZIRI KAPINGA ASEMA MRADI WA KUPELEKA UMEMEĀ  ENEO LA KITUME – BAGAMOYO WAFIKIA ASILIMIA 57

Naibu Waziri wa Nishati Judith Kapinga

Na MWANDISHI WETU

-DODOMA

NAIBU Waziri wa Nishati, Judith Kapinga amesema Serikali inafanya upanuzi wa kituo cha kupokea na kupoza umeme cha Mbagala mkoani Dar es Salaam ili kukiongezea uwezo utakaoondoa changamoto ya kukatika kwa umeme katika eneo hilo la Mbagala.

 Kapinga amesema hayo leo Juni 27, 2024 bungeni jijini Dodoma alipokuwa akijibu swali la Mbunge wa Mbagala, Abdallah Chaurembo aliyetaka  kufahamu Serikali itakomesha lini changamoto ya kukatika kwa umeme katika Jimbo la Mbagala.

Mbali na upanuzi wa kituo hicho cha Mbagala ambacho kinaongezewa transfoma ya 120MVA,  ambapo Kapinga amesema kwa hivi sasa hali ya upatikanaji umeme imeimarika Mbagala tofauti na ilivyokuwa mwaka jana.

Aidha, wakati  akijibu swali la Mbunge wa Bagamoyo Vijijini, Muharami Mkenge aliyetaka kufahamu lini mradi wa kupeleka umeme katika eneo la Kitume Kata ya Makurunge – Bagamoyo utaanza, Kapinga amesema Serikali kupitia Wakala wa Nishati Vijijini (REA) inaendelea kutekeleza miradi ya kupeleka umeme katika maeneo ya Bagamoyo.

Ameongeza kuwa, katika Kata ya Makurunge eneo la Kitume, REA inatekeleza mradi uitwao Electrification of Small Scale Mining, Industries and Agricultural Ares in Mainland Tanzania kupitia mkandarasi M/s Dieynem Company Limited.

Amesema mradi huo ulioanza Machi 2023, umefikia asilimia 57 ambapo kwa sasa mkandarasi amekwishasimika nguzo kwa umbali wa kilometa tisa.

Akizungumzia changamoto ya kuchelewa kukamilika  kwa mradi huo, Kapinga amesema kulitokana na maji ya mvua kujaa katika eneo kubwa ambalo mkandarasi anafanyia kazi na kuongeza kuwa mradi unatarajiwa kukamilika mwishoni mwa Desemba, 2024.

Kuhusu wananchi wa Kitongoji cha Sangwahela kilichopo katika kata ya Mapinga kupata huduma ya umeme, Kapinga amesema Serikali imepokea suala hilo na itafanyia tathmini ili kuweza kuwafikishia umeme wananchi wa maeneo hayo.

Google search engine

LEAVE A REPLY

Please enter your comment!
Please enter your name here